nakhara ’ima toliyap kin’i’iyaeh
ray’in ba:la’ min’alay basez pinoeh’ongan
ray linowang ralom ’ima somibo: ma ma’sih komita’ mam somapsapih ’ilaS
komalahang ma homohomoman koko:ol o ma hes’ezan kaehkaehoyan
ma ra:waS koko:ol, ’aehae’ kowaw ma maySiri: homayap
pa:ngas ’ima ’angiS tinokowaw─ kowaw, kowaw, kowaw
ray paka:asan ’asang bazae’en ’o’owa’ paSrahoe’ ka hinangih
haseb ’ilaS ma nabnaban ba:i’, tomiti:iS ka ’in’oya’a masa’ ma porawSi’
romo:o’, nak ray kawaS bintoe’an paSaSekla’en
ray paSanti’azem tilbabawen ray kawaS pas’elen
’ima monhae:ae’ pozok potoyen ila ray halis ma SaSo’ biyae’
pamari’ ni koko’ wa:on nom ’omalep nom komaloeh Sininbil wa’is
be:ayen ka siwa:, rompa: ila ka ’aehae boehoe:
’in’alay tatini’ a poe’oe’ paSlo:en ka pina:rakrak
bazae’ ’ima tatini’ kapa:tol kakiSlotor ray kaehma’
bazbazae’ ka tatini’ homabos ka kawaS ka rape:
ma ’a’oetoe’ masa’ nakhara Sikita’ tilka:an ila
poe’oe’ nak wa’ae’ ma tomkaw, ma ’okay honasamez hima’
komon’alay Sa ’izi’ ba:in ’izi’ manga’nga’ ka rinarangan tinal’oemaeh
’ima ra:am ila ki ’ima ra:nawan ’oemaeh, kakayzaehan o haha:ih
nak bazae’en ma hoSa:il wa’is mowa:i’ homawak
pakaSkoraeh ’oka’ kakrae:iwan ma ’akoey kapatalayan
ra:am ila ma’alo’ ki pakSiba:i:
mari’ ka ’inalep o mam raerae’oe: komita’ ka ’asang mae’iyeh ma ’oki karke:
mantamako’, makaksi’ael, ’alba:iS ka tinawbon, pinobae:aeh ki ’ayam
mal’az’aza’ sasapih ka linaSo’, babe:ay ka siwa:, ka pinoypo: tatonon
maSpalaw ki malraw, makakSiyae’ ki ’a’awpo’ ma hahangih
ray ’ima rae’seb kaspengan paparpe: kakayzaehan
homabos, paSanti’azem, nak pinaSkira:a’ pakSiwa’en ka sabsaboeh

ray hikor ’ima pama’ ila ka korkoring ma’ kin kayzaeh minae’rem
’oka’ ka wa’is ila nom SaSiyae’ ki korkoring
ka’oSa’an ray ka hontini’ kabanbanan potngor ila ka hahila:
kaSkoraeh nak zanzan koko:ol manmanra:an ray homom babaw
homom noka ba:i’ hiyopen naka ’ima hinwezwez ralom
ray ’alipa’, raromaeh, ’oeso’, biyae’, ma tatiway Saleme’
nak kak’i’iyaeh ’obilangan ’oS’oSnawan ma toliyap ray babaw
kak’i’iyaeh ’oka’ ka paksizaehan, ya:o haysiya ma ’i’iyaeh
ray ba:i’, ray ’a’oral, monmonhael bazae’ kobae:oeh ’am paS’ae:aeng
ma’an ’inoSa’ ’okik ra:waS
ka panpanabih nak poSpoS ’in’alay babaw Sisae:aeh hahoer
hinkosiza: ka koko:ol kiSba:aw o ma:tol ka rasiwazayan kapa:tol
pinoeh’ong kawaS babaw ’aehae’ homom ma hontani’
nak ma papongawan tatini’ a kinmae’iyaehan, mam parparana’an