’Engiw no Lalood
Faedet ko romi’ad to lalood,
nikaorira awa:ay ko maapiyanay.
I kalaeno no cidal, ’araw han i,
rarimo:wang sa ko ma’oripay a maamaan...
O himawali a hana i padatengan,
celak saan ko pising,
matiya o lipa:hak sanay a mihatatala to nikasadak no cidal,
matiya o mita’ongy a miaray to pa’oripay.
O raricay a ’ayam i palapalaan,
maefer sa i falefa:led, micopa^ to cahid,
satata’ang sa to soni,
matiya o miceli’ay a mihemek to Wama i kakarayan.
O dadacdac no lotok i kilakilangan,
wata:h caay ka saterep ko soni,
matiya o seykatay no lotolotokan.
m O wawa sato no i niyaro’ay,
masafolofolod a tayra i ’alo’aloan a mililoc,
makako^ko^ ko makako^ko^ay,
matatawatawa ko matatawatawaay,
matiraay ko wawa no Pangcah,
awaay ko kihar a malaholoholol to romi’ami’ad.
O i loma’ay a wina,
macidal ko romi’ad anini saan haw i,
sadaken ningra ko fodoy, o parok, ato o maamaan;
lalok sa a mipawali halokirokiro^
i fadahong no loma’ ato i pipawalian.
O maomahay i lotolotokan, ano eca^ i palapalaan,
katangasaan to ko kalahokan i,
ira to a tayra i kalaeno no kamoraw a maemin,
itira cangra a pasa^sa’ a mikisaepi’,
itira cangra a malahok,
itira cangra a pacarcar a mafoti’,
awaay ko kihar nangra a ma’orip matayal to romi’ami’ad.
I lawac sa no riyar, ’aloman ko mihololay,
ira ko nanicowacowa:ay a tayra mikifali no riyar,
ira ko nanipadakaay,
paheceken nangra ko masamaamaanay a cacelakan,
hawikeden nangra ko pacarcaran a kakafoti’an,
itira cangra a mapolin a pasa^sa’,
mitengil to soni no tapelik,
mangalay misorar to roray no tatirengan
ato pipaower nangra to faloco’ a pahanhan.
Wa:tah! Awaay ko maapiyanay to lalood!