Pchada equn cida ka bubu rudan u, mniq ku siyaw lmawa sediq mbari ka yaku. Mniq ku siyaw tpuraq balay lmawa, “Pnhuma nanaq kana ka sama, ini cyuqi noyaku, nhari miyah mari wah!” Qmita ku so ni skxlun balay bubu rudan ka equn pnsltudan, pskuraw bay lhbun mu mi ana rabang sqrasun mu balay.

Rmngaw ka Temu Nawi: “Spatas hangan sediq tnpusu u kiya ka balay bay hangan nami. Hangan mu pa rmirih Sediq nami, tndadal nami mi hnyuwan nami, so mosa hbaraw bay sediq tnpusu u dhuq smdiyal hangan nami nanaq dungan.”

Ini ku adas ana manu qqiya.

Msupu nami mntna kingal sapah pyasan muyas ka yami.

Mnsupu nami mniq alang Toda muyas ka yami.

Qrasun mu bay ka tnsapah nami.

Tmkarac bay qtan diyan ka karac, ini kskuy mi ini ktilux uri, mtltu bay ka niyuk bwihur. Smiling ku bubu mu, hmuya ma mbanah ka karac?

Msupu mppulah yami uri ka mptusa, mntna bay so kingal paru tnsapah ka sapah pyasan.

Smkuxul ku ocya tama rudan uri, malu bay mahun uri. Ou balay pnchada na equn cka hidaw ka bubu rudan, niqan qcurux, niqan rodux, niqan bawan mi niqan pngucun uri.

Mluqah qaqay na ka swayi snaw tama mu da. Wisu smmalu dnamux sapah ka hiya cida pa, peyyah dnamux sapah tburuq ka hiya da.

Kcka han mita ccamac pa hay, niqan dapa ngucun, dapa dmay mi lklic tora, uxay mu bay qntan kndadax cuxal ka kana ccmac ni, mqaras ku balay wada mu balay bay qtan diyax saya da.

Kndadax nami Tayhoku tapa kisya musa Tayto ka yami. Dhuq Tayto da u, swayi snaw tama pa mriq kisya miyah ppanan hiya snturung yami. Niqan beyhing bay nniqan tnbuwan ka dalih ssiyaw sapah swayi snaw tama, msupu nami mriq ddeyngsya musa nniqan tnbuwan hiya. Mniq nami nniqan tnbuwan hiya, han nami na ptabu miric mi tapa dapa dmay ka swayi snaw tama.