練習會話:

inaa:yaw izau kya ci Kadabuwang hananay, siacawa siwawa tu.cacay demiad caay pakahalhal tu patabu nu acawa, tizeng sa ciniza tihtih sa tu alabuh malabuyu’ i pasawali, u piawas maemek niza ku wawa mapatay, taluma’ sa mapatay tu ku acawa kalatan nu wacu, lalum satu ciniza, pacuken kaku hantu niza ku katuuday, yu mapatay ciniza sa tadem han i nuwalian a buyu’, maladietu tu nu buyu’ ci Kadabuwang.

izau kya cacay a limecedan, u tadasalunganay a limecedan ci panay ku ngangan niza, nicaliwayan ni Panay sa mabadi’ ku kilang atu lutuk, palumaungangay han nu katuuday ciniza. matengil ni Panay sa maimelang mapatay ciniza.sakamu satu ku kalas nu niyazu’ tadasalungan ci Panay kyu masikaz ku kilang atu lutuk sisa mabadi’,kyu usalunanay han ci Panay hananay.

itiza i sasa nu kilang pahanhan kiza balaut namin, makazih tu katalalan kiza cacay a balaut, sakaydihan ciniza malecad u katalalan ku tabaki, taneng kaku sa kiza balaut, malahi: ca kiza katalalan sa ciniza, besu hantu niza ku bili. caayhen katabaki, besuen henay niza ku bili, lingaling sa ku cabay namin, paci: ci han niza mibesu ku bili, pung! satu ku bili nu balaut, huming satu mapatay tu kiza pasenengay a balaut.

mingitid kiza wacu a milakec tu alangahay, makaazih ciniza tu adingu niza i nanum, izau ku zuma a wacu mingitiday tu tabakiay aca a titi nasa ciniza. ales han niza ku i lawayay niza a titi, ku mialaw ciniza tu maazihay niza a ningitidan a titi nuyza a wacu, azihan inayay tu kiza maazihay niza a titi, ningitidan niza a titi sa, mapalid tu nu nanum nu alangahay, tatenga’ inayay ku laheci nu maanubay.

sakamu sa ku kalang tu wawa a kalang, amana ka balat ku culil, amana pakiskis tu uzip namu i masengetay a baetu han niza. sakamu sa ku WaWaakalang, 「hang ina. annul pasubana’ kisu i takuwanan sa, paazihen henay kaku tu culil isu, kya tudungen nu maku」 ,han niza.

Amuhanin saikin, kasu i？ Minaunin saikin paitulahbing, kasu i? Niang saikin minaun paitulahbing, kasu i？ niang saikin minaun paitucingmut, muskun kata kudip. maun paitulahbing！

sumamad, pawanen nu Sakizaya ku nakamuwan nu dietu, sisa malinges ku dietu, pabalad hantu nu dietu. hicahicaen nuheni mibetik patudud tu limecedan atu kapah, caay pitengil ku dietu, wawa nu Tumuk ci Danwa u matinengay sibalucu’ ciniza atu ci Namuh ku patududay tu uzip, sasa’ satu ku udad. mahiza satusa Saputang a buyu’ izau kya salengacay tuluay kalimucu’ a baetu, katukuh ayza izau henay, u kulit nu dietu kuyni sa ku Sakizaya.

sitangahay a tademaw ci Butung, mikadabu i wawa nu Sakizaya ci Sayunan. matineng misanga’ tu culeng, cacay a demiad lineng han niza ku culeng, tatenga’ niculilan nu culeng sa malecad u nikalukan. pasubana’hantu ni Butung ku Sakizaya paluma tu kubkub, tipus ,habay, paza’, manamuh ku tademaw ci Butungan.

i taw:ya i Maibul izau ku dietu i tiza, izau ku kaliyah, u tadatadah atu lalimenah. u kaliyah sa, mukan tu atay nu wawa, demiad pasengi tu ina nu wawa amipacucu, katuud tu ku nilisapen niza tu wawa. u tadatadah sa milihiza i labi, matawid ku makazihay, mapatay nu imelang ku zuma a tademaw namakaazih. u lalimenah sa, i teban nu labi mibalakas tu imelangay, mabi’ ku imelangay ladayen niza taputah midang, kyu caay ka aniwiw ku imelangay. sisa sidietuay a niyazu’ han ku Maibul.

i taw:ya, izau ku kapah ci Picay Kakalaw, maydih malabunac ciniza. namakabalunga bahal tayza i nutataynaan a kanatal, malubu sa tu pinapina a miheca, i tawya sa bilanga atu buting ku patahkalay ci nizaan. sakaydihan a taluma’ sisa mikilim tu sadama i kalas nu tau, namahiza bahal sa tahkal namakabayu ku dietu, sakamusa saicelangen, kainaneng, nanutawya sa izau tu ci Picay Kakalaw tu sananal i nuwalian malabunac.

i taw:ya nu walian nu Pazik izau itiza ci Butuc aci Sabak a lecuhen,u cikah atu lala’ ku sapakan nu dietu, u saayaway nu Sakizaya a tademaw kuheni. nababalaki nu Sakizaya mitepal tu bayu, sisa mukan tu lalacan, itiza nalecuhan nuheni saupu sa ku nikanan tu lalacan masabuyu’, nalalacanan han pangangan itiza, u saayaway a naenengan nu Sakizaya.